Katika tukio lililozua taharuki kubwa duniani, Israel imeendesha mashambulizi ya angani dhidi ya maeneo muhimu ya nyuklia ya Iran, huku Iran ikijibu kwa mashambulizi makali ya makombora dhidi ya miji mbalimbali ya Israel. Hali hii imesababisha hofu kubwa ya kuanza kwa vita kubwa ya moja kwa moja kati ya mataifa haya mawili hasimu.

Mashambulizi ya Israel yalilenga moja kwa moja kituo kikuu cha kurutubisha urani cha Natanz, ambacho ni sehemu nyeti ya mpango wa nyuklia wa Iran. Kwa mujibu wa ripoti za satelaiti na duru za kiintelijensia, uharibifu mkubwa umetokea kwenye maeneo ya chini ya ardhi ambako mashine za kurutubisha urani huhifadhiwa. Wakati huohuo, maeneo ya karibu na kituo cha maji mazito cha Khondab—ambacho kinahusiana na utengenezaji wa plutoniamu kwa matumizi ya kijeshi—pia yalilengwa na kushambuliwa.

Hata hivyo, Shirika la Atomiki la Iran (AEOI) lilithibitisha kutokea kwa mashambulizi hayo lakini likasisitiza kuwa hakuna madhara makubwa yaliyotokea. Kwa mujibu wa taarifa yao rasmi, hakuna mionzi iliyovuja, hakuna majeruhi walioripotiwa, na shughuli nyingi za kinyuklia zinaendelea kurejeshwa katika hali ya kawaida. Iran imekemea mashambulizi hayo na kuyataja kama ukiukaji mkubwa wa sheria za kimataifa, ikisisitiza kuwa ina haki ya kujibu kwa nguvu.

Fuatilia ukurasa wetu wa YouTube upate habari za hivi punde kuhusu vita kati ya Iran na Israel.