Askofu Mkuu wa Kanisa Katoliki Jimbo Kuu la Songea, Damian Dallu, ametangaza kutoweka kwa Padri Camillus Nikata, ambaye ni Mhadhiri katika Chuo Kikuu cha Mtakatifu Augustino Tanzania (SAUT), Mwanza.

Katika taarifa yake iliyotolewa leo, Askofu Dallu amesema kuwa Padri Nikata haonekani wala hapatikani kwa simu.

Askofu Dallu amesema padri alikuwa ametokea Dodoma kwenye mafundisho ya moyo ya mapadri wanaofundisha katika vyuo vikuu vya TEC, akiwa na mhadhiri mwenzake wa Jimbo.

Inaelezwa kuwa alipanga kusafiri kwenda Mwanza Oktoba 8, 2025 kwa basi la Super Feo, na tayari alikuwa amenunua tiketi kwa njia ya mtandao.

Taarifa inazidi kueleza kuwa, walipoanza kuangalia Jumatano mchana, waligundua kuwa hakusafiri kwani mzigo wake ulikuwa bado umebaki katika chumba chake kilichofungwa, na ufunguo haukurudishwa kwa mtumishi wa nyumba ya mapadri.

Jitihada za kumtafuta kwa simu na kuulizia kwa watu waliokuwa naye hazikuzaa matunda, na alikosekana pia Mwanza, mahali alipokuwa amepanga kufika.

Ofisi ya mabasi ya Super Feo ilithibitisha kuwa hakusafiri kwa basi hilo.

Baada ya kushindikana kwa jitihada za kumtafuta Padri Nikata, Askofu Dallu amesema kuwa tayari wameshatoa taarifa kwa Jeshi la Polisi ili msaada zaidi upatikane na kumtafuta padri huyo.

Tufuatilie kupitia YouTube ya Global TV, like, comment ili kuendelea kuhabarika kila siku kwa habari mbalimbali zenye ukweli na uhakika.