Serikali ya Iran imelaani vikali mashambulizi ya anga yaliyofanywa na Marekani dhidi ya vituo vyake vya nyuklia, ikiyataja kuwa ya kikatili na ukiukaji wa sheria za kimataifa.
Waziri wa Mambo ya Nje wa Iran, Abbas Araqchi, amesema mashambulizi hayo hayana heshima wala uhalali na kuonya kuwa yatakuwa na athari za muda mrefu. “Iran ina haki ya kujilinda na haitasita kuchukua hatua yoyote itakayohitajika kwa ajili ya kulinda watu na rasilimali zake,” alisema Araqchi.
Tume ya Nishati ya Atomiki ya Iran pia imetoa tamko, ikisisitiza kuwa haitasitisha maendeleo yake ya nyuklia kwa matumizi ya amani licha ya mashinikizo ya nje. Tume hiyo imetaja mashambulizi hayo kama ukiukaji wa Mkataba wa Kimataifa wa Kupunguza Silaha za Nyuklia (NPT).
Kiongozi Mkuu wa Iran, Ayatollah Ali Khamenei, awali alionya kuwa mashambulizi dhidi ya Iran yatakuja na madhara makubwa na yasiyoweza kufutika.
Iran imesisitiza kuwa itaendelea kulinda maslahi ya taifa kwa njia zote ikihusisha diplomasia na, pale itakapolazimika, hatua za kijeshi.
Hakuna maoni bado. Kuwa wa kwanza kuandika maoni!