Mkuu wa Mkoa wa Dar es Salaam, Albert Chalamila, amezungumza na Global TV akitoa tathmini ya hali ya ulinzi na usalama jijini Dar es Salaam, ambapo amesema jiji lipo katika utulivu na shughuli za wananchi zinaendelea kama kawaida.

Katika mahojiano hayo, Chalamila ameeleza kuwa vyombo vya ulinzi na usalama vinaendelea na doria na ufuatiliaji wa karibu ili kuhakikisha hakuna vitendo vinavyoweza kuhatarisha amani. Amesisitiza kuwa wananchi waendelee kuwa watulivu na kufanya shughuli zao bila hofu.

Aidha, Chalamila ametoa ufafanuzi kuhusu baadhi ya watu ambao, kwa maneno yake, “hawakuelewa ipasavyo” maelezo ya Waziri Mkuu, Mwigulu Nchemba, yaliyotolewa hivi karibuni. Amesema kauli ya Waziri Mkuu ilikuwa ya kuhimiza utulivu na kufikisha ujumbe wa Serikali kuhusu kuhakikisha hakuna uvunjifu wa amani.

Ameongeza kuwa ni muhimu Watanzania kusoma na kusikiliza taarifa za Serikali kwa usahihi, badala ya kutegemea tafsiri potofu zinazosambaa kwenye mitandao ya kijamii.

Chalamila amehitimisha kwa kuwataka wananchi kuendelea kushirikiana na Serikali na vyombo vya ulinzi katika kulinda amani ya jiji na nchi kwa ujumla.

The post Chalamila: Msipotoshwe, Hali ya Usalama Iko Vizuri Jijini Dar – Video appeared first on Global Publishers.