Serikali ya China imetoa onyo kali kwa utawala wa Rais wa Marekani Donald Trump, kuhusu mpango wa kurejesha ushuru wa juu kwa bidhaa kutoka China kuanzia Agosti 1, ikisema kuwa hatua hiyo inaweza kuchochea mvutano mpya wa kibiashara kati ya mataifa hayo mawili makubwa kiuchumi duniani.

Kupitia makala maalum iliyochapishwa na gazeti la serikali la People’s Daily, chini ya jina la kalamu “Zhong Sheng” – linaloashiria msimamo rasmi wa serikali ya China katika masuala ya kidiplomasia – Beijing imeonya kuwa haitakubali kushambuliwa kiuchumi bila kujibu.

“China haitaacha mashambulizi ya kiuchumi dhidi yake yakiendelea bila hatua. Nchi yoyote itakayoshirikiana na Marekani katika kutusukuma nje ya minyororo ya usambazaji kimataifa, itakabiliwa na hatua za kulipiza kisasi.”

China pia imesema itachukua hatua dhidi ya nchi nyingine zitakazoshiriki katika mikakati ya kuiondoa kwenye mfumo wa usambazaji wa kimataifa, hali inayoashiria upanuaji wa mzozo huu kuwa wa pande nyingi.

Haya yanajiri licha ya makubaliano ya awali ya kibiashara yaliyofikiwa kati ya Marekani na China mwezi Juni 2025, ambayo yalilenga kupunguza mvutano uliodumu kwa miaka kadhaa. Hata hivyo, masuala muhimu kama ushuru wa upande mmoja, ulinzi wa haki miliki, na upatikanaji wa masoko bado hayajapatiwa suluhisho la kudumu.

Rais Trump, kwa upande wake, alitangaza Jumatatu kuwa iwapo hakuna makubaliano mapya yatakayofikiwa kufikia Agosti 12, ushuru mpya utaanza kutumika rasmi Agosti 1.

NAIBU WAZIRI MKUU BITEKO APASUA UKWELI – “KAWAIDA KUGAWANYIKA WAKATI wa UCHAGUZI -HATUWEZI KUFANANA”