Cairo, Misri – Rais wa Misri Abdel Fattah El-Sisi amefanya mazungumzo na Rais wa Uganda, Yoweri Museveni, mjini Cairo Jumanne, ambapo suala nyeti la Mto Nile lilitawala ajenda.

Katika mkutano wa pamoja na wanahabari, Sisi alisisitiza kuwa Misri itachukua hatua zote kulinda usalama wa maji yake, akionekana kunyooshea kidole mradi wa Bwawa la Grand Renaissance (GERD) la Ethiopia, ambalo Cairo inahofia litapunguza mtiririko wa maji. Addis Ababa imekanusha hofu hizo.

Sisi alionya kuwa “yeyote anayedhani Misri itafumbia macho tishio la kimsingi kwa usalama wa maji yake anajidanganya,” akiongeza kuwa hatua zote za kisheria kimataifa zitachukuliwa kulinda rasilimali za taifa hilo.

Kwa mujibu wa wataalamu, endapo bwawa hilo litafanya kazi bila makubaliano ya pamoja, Misri inaweza kupoteza hadi asilimia 25 ya mtiririko wa maji katika vipindi vya ukame, hali itakayohatarisha kilimo, ajira na hifadhi ya maji kwenye Bwawa la Aswan.

Mzozo huu umedumu zaidi ya miaka kumi bila suluhu, huku mataifa ya juu ya mto yakidai mikataba ya enzi za kikoloni ilizipa Misri na Sudan haki kubwa kuliko inavyostahili, na Cairo ikishikilia usalama wa maji kuwa suala la uhai.