Msanii maarufu wa Bongo Fleva, Harmonize, alikuwepo miongoni mwa mastaa wakubwa waliohudhuria sherehe ya kumbukizi ya kuzaliwa kwa mtoto wa Paula Paul na mwanamuziki Marioo, iliyofanyika katika Hoteli ya White Sands, jijini Dar es Salaam.

Katika tukio hilo lililojaa shamrashamra, Harmonize alitumbuiza jukwaani akiwa ameandamana na Kajala Masanja, mama wa Paula, hatua iliyozua minong’ono kuwa wawili hao huenda wameamua kurejesha mahusiano yao ya awali.

Akizungumza mbele ya wageni waalikwa, Kajala alifunguka kwa mara ya kwanza kuhusu maisha ya kuwa bibi, akieleza kuwa tangu Paula ajifungue, amekuwa mstari wa mbele katika kuhakikisha mtoto wao analelewa katika mazingira salama na yenye upendo.

“Nimekuwa nikitekeleza majukumu yote kama mama kwa mjukuu wangu tangu siku ya kwanza. Ni jukumu kubwa lakini la fahari kwangu,” alisema Kajala kwa hisia.

Kajala pia aliwasihi Paula na Marioo kuendeleza mshikamano na kushirikiana kwa karibu katika malezi ya mtoto wao, Amara, kwa lengo la kumjengea maisha bora na yenye maadili mema.

Sherehe hiyo iliweka pamoja sura nyingi maarufu kutoka tasnia ya burudani, ikiwemo wanamuziki, waigizaji na watu maarufu wa mitandaoni, na kuonesha mshikamano wa kijamii na furaha ya pamoja kwa ujio wa mtoto huyo.

Tukio hilo limeacha gumzo mitandaoni, huku mashabiki wengi wakifurahishwa na muonekano wa familia hiyo na kuwapongeza kwa hatua wanazopiga katika maisha yao ya kifamilia.