Rais wa Jamhuri ya Kenya, William Samoei Ruto, amepuuzilia mbali vikali wito wa maandamano unaoendelea kutolewa na waandamanaji pamoja na viongozi wa upinzani, wakimtaka ajiuzulu kutoka madarakani. Akizungumza katika mkutano wa hadhara wakati mvutano wa kisiasa nchini ukiendelea kupamba moto, Rais Ruto alisema kuwa kauli za “Ruto lazima aondoke” ni maneno matupu yasiyo na msingi wowote wa kikatiba, isipokuwa yatakapowasilishwa kwa njia ya halali na yenye mwelekeo wa kujenga taifa.
Katika hotuba yake, Rais Ruto alisisitiza kuwa hatashinikizwa kuondoka madarakani kupitia ghasia au misukumo ya mitandaoni, bali yuko tayari kuhukumiwa kwa mujibu wa Katiba ambayo ndiyo dira ya utawala wa kidemokrasia nchini Kenya.
“Ikiwa ni suala la masharti, Katiba tayari imeshatatua na kusuluhisha suala la ukomo wa muda. Unaweza kuwa wa muhula mmoja au miwili… huwezi kuwa na zaidi ya hayo. Kwa hivyo ni nini shauku hii kuhusu masharti?” alihoji Rais Ruto kwa msisitizo.
Aidha, aliwataka viongozi wa upinzani na waandamanaji kuacha kushinikiza mabadiliko kwa njia ya fujo na badala yake waje na mipango mbadala yenye tija kwa wananchi wa Kenya. Alisema kuwa ukosoaji wa serikali ni haki ya kikatiba, lakini lazima ufanyike kwa namna ya kujenga na si kubomoa.
“Ikiwa ni ‘Ruto lazima aende’, basi niambie jinsi unavyotaka niende. Unamaanisha nini unaposema hivyo? Niendeje? Kwa sababu tuna Katiba,” alisema huku akitoa changamoto kwa wapinzani wake kuwa na mjadala wa kitaifa unaozingatia hoja, si mihemko.
Kauli ya Rais Ruto inakuja wakati maandamano makubwa yakiendelea kote nchini, yakiongozwa na vijana na makundi mbalimbali ya kijamii wakilalamikia hali ngumu ya maisha, gharama ya juu ya maisha, na mwelekeo wa sera za kiuchumi za serikali ya sasa. Hashtag maarufu ya #RutoMustGo imekuwa ikisambaa kwa kasi katika mitandao ya kijamii, ikiwa ni sehemu ya presha ya kidijitali dhidi ya utawala wake.
Hata hivyo, Rais Ruto amesisitiza kuwa yuko tayari kusikiliza maoni ya wananchi na kupokea ushauri wa kujenga, lakini hatakubali kuondolewa madarakani kwa njia ambazo hazizingatii Katiba.
Hakuna maoni bado. Kuwa wa kwanza kuandika maoni!