Kampuni ya Serengeti Breweries Limited (SBL) imewakutanisha wadau kutoka tasnia mbalimbali jijini Dar es Salaam katika mkakati maalum wa kutambulisha kinywaji kipya cha Serengeti Premium Apple, kinachozalishwa nchini Tanzania.

Kikao hicho kilifanyika katika mgahawa wa Upper Deck, ambapo wadau kutoka sekta za ulimbwende, mavazi, ubunifu, ujasiriamali na taaluma nyingine walipata fursa ya kufahamishwa kwa undani kuhusu chapa hiyo mpya, ikiwemo historia yake, nafasi sokoni na maono yake kwa walaji wa kisasa wanaothamini ubora na mtindo wa maisha wenye hadhi ya juu.

Akizungumza katika kikao hicho, Bw. Wema Mugofwa kutoka SBL alieleza kuwa bidhaa hiyo mpya ni sehemu ya dhamira ya kampuni katika kuendeleza ubunifu na ubora wa bidhaa zinazozalishwa nchini, huku akibainisha kuwa kinywaji hicho kinaakisi mabadiliko ya ladha na mahitaji ya watumiaji wa sasa.

Aliongeza kuwa SBL inashirikiana na wabunifu wa maudhui ili kusaidia kusimulia hadithi ya chapa hiyo kwa njia ya kuvutia na inayowafikia Watanzania wengi kupitia majukwaa mbalimbali.

Mbali na mawasilisho, kikao hicho pia kilitoa nafasi ya majadiliano ya wazi kati ya wadau na timu ya masoko ya kampuni hiyo, ambapo washiriki waliweza kuuliza maswali na kupata ufahamu zaidi kuhusu mwelekeo wa uzinduzi pamoja na shughuli zinazotarajiwa kuambatana na bidhaa hiyo.

Wadau waliohudhuria walionesha shauku kubwa na matarajio ya kushiriki katika uzinduzi rasmi wa bidhaa hiyo, huku wakivutiwa na ubunifu uliotumika katika maandalizi ya tukio hilo. Kwa ujumla, maandalizi yanaendelea huku tukio hilo likitarajiwa kuvutia hisia za wengi na kuleta sura mpya katika soko la vinywaji nchini.

The post SBL Yatambulisha Serengeti Premium Apple Kwa Wadau Dar appeared first on Global Publishers.