KIKOSI cha Yanga kimefanikiwa kutinga hatua ya nusu fainali ya Kombe la Mapinduzi baada ya kuibuka na ushindi mwembamba wa bao 1-0 dhidi ya TRA United katika mchezo uliochezwa kwenye dimba la New Amaan Complex, Zanzibar.

Bao pekee la ushindi kwa mabingwa hao wa Ligi Kuu Tanzania Bara lilifungwa na kiungo mshambuliaji, Célestin Ecua, dakika ya 31 ya mchezo, akitumia vyema nafasi iliyopatikana na kuwatikisa TRA United.

Mchezo huo ulikuwa na ushindani mkubwa huku TRA United wakijitahidi kusawazisha lakini safu ya ulinzi ya Yanga ilionyesha uimara na nidhamu ya hali ya juu kuzuia mashambulizi ya wapinzani wao.

Yanga walitawala sehemu kubwa ya mchezo hasa kipindi cha kwanza, wakimiliki mpira na kucheza pasi fupi fupi huku wakitengeneza nafasi kadhaa za kufunga mabao zaidi, lakini walikosa umakini katika umaliziaji.

Kipindi cha pili TRA United waliongeza kasi wakitafuta bao la kusawazisha, hata hivyo walikumbana na upinzani mkali kutoka kwa walinzi wa Yanga pamoja na kipa aliyekuwa makini langoni.

Kwa ushindi huo, Yanga wamehakikisha nafasi yao katika nusu fainali ya pili ya mashindano hayo, ambapo watavaana na Singida Black Stars mnamo Januari 9 katika dimba hilo hilo la New Amaan Complex.

Matokeo hayo yanaendelea kuipa Yanga morali kubwa katika mashindano ya Kombe la Mapinduzi, huku mashabiki wao wakitarajia timu hiyo kuendelea kuonyesha ubora na kupambana hadi hatua ya fainali.

The post ECUA AIBEBA YANGA NUSU FAINALI appeared first on Soka La Bongo.