Waziri wa Maendeleo ya Jamii, Jinsia, Wanawake na Makundi Maalum,  Dkt. Dorothy Gwajima

Ndugu Wananchi,
Napenda kuwakumbusha kuhusu taarifa yangu ya awali iliyotolewa tarehe 20 Aprili 2025, ikihusu tukio la udhalilishaji lililofanywa na baadhi ya wanafunzi wa chuo kikuu dhidi ya binti mwenzao, ambalo limesikitisha na kugusa hisia za watu wengi.

Jeshi la Polisi linaendelea na kazi yake ya kuwahoji wahusika wote wa tukio hilo, kama sehemu ya wajibu wake wa kuhakikisha haki inatendeka. Wakati huo huo, kumekuwepo na maswali kutoka kwa wananchi kuhusu mtu anayeitwa Mwijaku, ambaye ametajwa katika video zinazohusiana na tukio hilo – watu wakitaka kujua kwa nini hajachukuliwa hatua hadi sasa.

Naomba kuwahakikishia kuwa, Mwijaku naye atahojiwa na vyombo vya sheria kama sehemu ya uchunguzi unaoendelea. Baada ya hatua hizo za kisheria, Wizara yangu itatathmini kwa kina mustakabali wa maadili ya jamii na nafasi ya watu wenye ushawishi kama yeye, ambao matendo yao yanaweza kuwa na athari – iwe chanya au hasi – katika maendeleo ya maadili yetu.

Natoa wito kwa wananchi wote kuwa watulivu na kuendelea kufuatilia taarifa rasmi kutoka Jeshi la Polisi. Tuendelee kushirikiana kwa ajili ya kujenga jamii yenye heshima, utu, na maadili mema.

Imetolewa na:
Mhe. Dkt. Dorothy Gwajima
Waziri wa Maendeleo ya Jamii, Jinsia, Wanawake na Makundi Maalum