Ushirikiano wazinduliwa wakati wa ufunguzi wa Wiki ya AZAKI 2025 jijini Arusha, Tanzania.

Taasisi ya Vodacom Tanzania Foundation leo umetangaza uwekezaji wa TZS bilioni 3.25 kwa kipindi cha miaka mitatu ili kuendeleza sekta ya elimu nchini Tanzania kupitia ushirikiano mpya na Taasisi ya Elimu Tanzania (TIE) na Twaweza Afrika Mashariki. Tangazo hili lilitolewa wakati wa ufunguzi rasmi wa Wiki ya AZAKI 2025, kwa heshima ya uwepo wa Mhe. Adolf Mkenda, Waziri wa Elimu, Sayansi na Teknolojia.

Kaimu Mkurugenzi wa Kituo cha Mafunzo ya Mitaala katika Taasisi ya Elimu Tanzania (TIE), Dkt. Angela Katabaro (kushoto), na Mkurugenzi wa Mahusiano wa Vodacom na Vodacom Tanzania Foundation, Zuweina Farah (kulia), wakishiriki katika hafla ya utiaji saini wa ishara kwa niaba ya taasisi zao kwa ajili ya ushirikiano wa kuviwezesha Vituo 184 vya Rasilimali za Walimu kwa vifaa vya TEHAMA na intaneti ili kusaidia mafunzo ya walimu kupitia mpango wa MEWAKA. Hafla hii imefanyika leo katika Hoteli ya Mount Meru, Arusha wakati wa uzinduzi rasmi wa Wiki ya CSO 2025.

Akizungumza katika hafla hiyo, Zuweina Farah, Mkurugenzi wa Mahusiano wa Vodacom Plc na Vodacom Tanzania Foundation, alisema: “Kupitia ushirikiano huu, tunalenga kuimarisha ubora wa elimu nchini Tanzania kwa kuwapa walimu zana sahihi na kuwasaidia wanafunzi kujenga ujuzi madhubuti wa msingi. Uwekezaji katika elimu leo utatoa fursa zaidi kwa vizazi vijavyo.”

Kwa kushirikiana na Taasisi ya Elimu Tanzania (TIE), Vodacom itaviwezesha Vituo 184 vya Rasilimali za Walimu (TRCs) kwa vifaa vya TEHAMA na huduma ya intaneti ya uhakika ili kusaidia utekelezaji wa mpango wa serikali wa Maendeleo Endelevu ya Utaalamu wa Walimu (TCPD) ujulikanao kama MEWAKA. Miundombinu hii ya kidijitali itawawezesha walimu zaidi ya 300,000 nchini kote kufikia vifaa vya kujifunza kupitia Mfumo wa Usimamizi wa Kujifunza (LMS), na hivyo kuboresha ubora wa ufundishaji kwa mujibu wa mtaala mpya wa msingi wa umahiri wa mwaka 2023 wa Tanzania.

Dkt. Angela Katabaro, Mkurugenzi Mkuu wa TIE, alisema: “Uwezeshaji wa walimu kwa TEHAMA ni jambo la msingi katika utoaji wa elimu bora. Kupitia ushirikiano na Vodacom, tunaweza kupanua mpango wetu wa MEWAKA na kuziba pengo la kidijitali.”

Aidha, ushirikiano wa Taasisi ya Vodacom Foundation na Twaweza utaunga mkono upanuzi wa mpango wa KiuFunza Pay-by-Skill, ambao unawapa motisha walimu wa darasa la 1-3 kuwasaidia wanafunzi kumudu stadi za msingi za kusoma, kuandika na kuhesabu. Mpango huu utafanyika katika shule 865, ukifikia zaidi ya wanafunzi 360,000 wa madarasa ya awali ya msingi. Takwimu za kitaifa zinaonesha kuwa asilimia 60 ya watoto wa miaka 10 nchini Tanzania bado wanapata changamoto ya kusoma na kuelewa hadithi rahisi.

Anna Bwana, Mkurugenzi Mtendaji wa Twaweza Afrika Mashariki, alisema: “Ushirikiano huu unahakikisha kuwa kujifunza kunatokea katika kila darasa. Tuna ushahidi dhabiti kuwa Pay-by-Skill unafanya kazi. Unawatia motisha walimu na kuboresha matokeo kwa watoto.”

Mkurugenzi Mtendaji wa Twaweza East Africa, Bi. Anna Bwana (kushoto), na Mkurugenzi wa Mahusiano wa Vodacom na Vodacom Tanzania Foundation, Zuweina Farah (kulia), wakionyesha makubaliano ya ishara ya ushirikiano wao unaotarajiwa kupanua mpango wa KiuFunza Pay-by-Skill unaolenga kuboresha elimu ya msingi. Tukio hili limefanyika leo katika Hoteli ya Mount Meru, Arusha wakati wa Wiki ya CSO 2025.

Uwekezaji wa elimu wa Vodacom Tanzania unalingana na vipaumbele vya kitaifa vya elimu nchini Tanzania, Lengo la Maendeleo Endelevu namba 4 (elimu bora), pamoja na dhamira ya Vodacom ya kuwawezesha watu kupitia elimu jumuishi, mabadiliko ya kidijitali, na ubunifu kwa ajili ya matokeo chanya. Katika kipindi cha miaka mitatu, Vodacom Foundation itatoa fedha pamoja na msaada wa kitaalamu katika kuimarisha utekelezaji wa programu, utafiti, ufuatiliaji, na utetezi.

The post Taasisi ya Vodacom Foundation Kuwekeza TZS Bilioni 3.25 Kwenye Elimu Kupitia Ushirikiano naTaasisi ya Elimu Tanzania na Twaweza Afrika Mashariki appeared first on SwahiliTimes.