Iran imekosoa vikali mpango wa Marekani wa kuongeza shinikizo la kiuchumi dhidi ya Tehran, ikivitaja vikwazo hivyo kuwa sehemu ya kampeni ya kuiweka Iran katika hali ngumu kiuchumi.

Wizara ya Mambo ya Nje ya Iran imeeleza kuwa vikwazo vipya vya Marekani ni aina ya “ugaidi wa kiuchumi” na imevitaja pia kuwa uhalifu dhidi ya ubinadamu.

Hatua hiyo imekuja baada ya Waziri wa Hazina wa Marekani, Scott Bessent, kutangaza kuwa Washington iko tayari kutekeleza hatua kali zaidi za kiuchumi dhidi ya Iran. Bessent amesema Marekani inatarajia kutangaza hatua hizo mpya Jumatatu, Agosti 24, huku akizielezea kama baadhi ya vikwazo vikali zaidi kuwahi kuwekwa dhidi ya Tehran.

Marekani pia imeonya kuwa nchi na taasisi zitakazoendelea kutoa msaada wa kiuchumi au kufanya biashara na Iran zinaweza kukabiliwa na hatua za ziada za vikwazo.

Kwa upande wa Iran, Spika wa Bunge, Mohammad Baqer Qalibaf, amesema Tehran inahitaji mpango wa kukabiliana na kile alichokiita vikwazo visivyo vya haki. Pia amesisitiza umuhimu wa kuimarisha uhusiano wa kiuchumi na nchi nyingine ili kupunguza madhara ya shinikizo la Marekani.

Mzozo huo unaendelea kuongeza presha kwenye uchumi wa Iran, wakati Marekani ikiendelea na mkakati wa kuzuia vyanzo vya mapato vya Tehran na kuiweka katika hali ya kutengwa zaidi kiuchumi.

Iran, hata hivyo, imeendelea kuonyesha msimamo wa kupinga shinikizo hilo na kusema itatafuta njia mbadala za biashara na fedha ili kupunguza utegemezi wake kwenye mifumo inayoweza kuathiriwa na vikwazo vya Marekani.

Hali hiyo imeongeza mvutano kati ya Washington na Tehran, huku suala la vikwazo likiendelea kuwa moja ya maeneo makubwa ya mzozo kati ya pande hizo.

Stori na Erick Elibariki | GPL – TUDACO

The post Iran Yakosoa Vikwazo Vipya vya Marekani, Yavitaaja “Ugaidi wa Kiuchumi” appeared first on Global Publishers.