Kiongozi wa genge la dawa za kulevya la Jalisco New Generation Cartel (CJNG), Nemesio Oseguera Cervantes maarufu kama “El Mencho,” alizikwa Jumatatu katika jeneza la dhahabu, akizungukwa na ulinzi mkali wa jeshi katika mji wa Zapopan, karibu na Guadalajara, jimbo la Jalisco, Mexico.

Afisa wa serikali alithibitisha kuwa mazishi yalifanyika Zapopan, lakini Ofisi ya Mwanasheria Mkuu ilikataa kuthibitisha rasmi eneo hilo kwa sababu za kiusalama. Watu walihudhuria msafara wa mazishi, baadhi wakiwa na miavuli myeusi, huku bendi ikipiga muziki wa kitamaduni “banda.”

“El Mencho” aliuawa na jeshi la Mexico zaidi ya wiki moja iliyopita wakati wa operesheni ya kumkamata katika eneo la Tapalpa, Jalisco. Kwa mujibu wa cheti cha kifo, alifariki kutokana na majeraha ya risasi kifuani, tumboni na miguuni. Yeye pamoja na walinzi wake wawili walijeruhiwa vibaya katika mapambano na wanajeshi na kufariki njiani kuelekea hospitali.

Kifo chake kilichochea vurugu katika majimbo takriban 20 nchini Mexico, huku zaidi ya watu 70 wakiripotiwa kufariki kufuatia operesheni hiyo na mashambulizi ya kulipiza kisasi. Serikali imesema operesheni za kiusalama dhidi ya viongozi wengine wa ngazi za juu wa CJNG zinaendelea.

Mazishi ya wakubwa wa magenge ya dawa Mexico mara nyingi huzungukwa na usiri mkubwa. Ndani ya saa chache baada ya kifo chake, tayari zilitungwa nyimbo za “narcocorridos” zikisimulia maisha na kifo chake, jambo linalochochea hadhi ya kimitholojia miongoni mwa wafuasi wao.

The post Mazishi ya El Mencho Yafanyika Katika Hali ya Ulinzi Mkali Mexico appeared first on Global Publishers.