Kamati ya Tuzo ya Amani ya Nobel imemtangaza Maria Corina Machado, kiongozi wa upinzani na mwanaharakati wa demokrasia kutoka Venezuela, kuwa mshindi wa Tuzo ya Amani ya Nobel kwa mwaka 2025.

Akizungumza mjini Oslo, Mwenyekiti wa Kamati ya Nobel, Jorgen Frydnes, alisema Machado ametunukiwa tuzo hiyo kwa mchango wake mkubwa katika kupigania haki za kidemokrasia, uhuru wa kisiasa, na mpito wa amani kutoka kwa utawala wa kidikteta kuelekea demokrasia ya kweli nchini Venezuela.

“Tuzo hii inatambua ujasiri na uthabiti wa Maria Corina Machado katika kusimamia maadili ya demokrasia na uhuru wa raia, licha ya vikwazo, vitisho na mateso aliyokumbana nayo kutoka kwa serikali ya nchi yake,” alisema Frydnes.

Machado amekuwa akiongoza harakati za kisiasa na kiraia nchini Venezuela kwa zaidi ya miongo miwili, akihamasisha mageuzi ya kikatiba, uwajibikaji wa viongozi, na haki kwa wananchi. Jitihada zake zimekuwa dira ya matumaini kwa mamilioni ya Wavenezuela wanaotamani mabadiliko ya amani.

Kwa kutunukiwa Tuzo hii, Maria Corina Machado anaungana na orodha ya viongozi mashuhuri duniani waliowahi kupewa heshima hiyo kutokana na jitihada za kuendeleza amani, demokrasia na haki za binadamu.